୫-ଟି ସଚିବ ଭିକେପାଣ୍ଡିଆନ ଙ୍କ ସୁବର୍ଣ୍ଣପୁର ଜିଲ୍ଲା ଗସ୍ତ ପରେ ସରକାରୀ ସହାୟତା ଘୋଷଣା କୁ ନେଇ ତୀବ୍ର ପ୍ରତିକ୍ରିୟା

ସୁବର୍ଣ୍ଣପୁର(ସଚେତନ ନ୍ୟୁଜ)ଗତ ୪ ତାରିଖରେ ୫-ଟି ସଚିବ ଭି କେ ପାଣ୍ଡିଆନ ବହୁ ଆଡମ୍ବରରେ ସୁବର୍ଣ୍ଣପୁର ଗସ୍ତ ରେ ଆସିଥିଲେ। ତାଙ୍କର ଗସ୍ତବେଳେ ୫ ଗୋଟି ହେଲିପ୍ୟାଡ ମଧ୍ୟ ନିର୍ମାଣ କରାଯାଇଥିଲା। ୩୬୦ ଗୋଟି ବସରେ ମାଁ ଭଉଣୀ ମାନଙ୍କୁ ସଭାସ୍ଥଳକୁ ବୁହାହୋଇ ସଭାସ୍ଥଳ ମାନଙ୍କୁ ଲୋକାରଣ୍ୟ ମଧ୍ୟ କରାଯାଇଥିଲା। ସମଗ୍ର ଜିଲ୍ଲାର ବୁଦ୍ଧିଜୀବୀ ତଥା ଜନସାଧାରଣ ତାଙ୍କର ଗସ୍ତରୁ ଅନେକ ସୁଫଳ ଆଶାକରି ଜିଲ୍ଲାରେ ଏକ ସୁବର୍ଣ୍ଣ ଯୁଗର ଆରମ୍ଭ ହେବ ବୋଲି ଅପେକ୍ଷା କରିଥିଲେ ଯାହାକୁ ବିଭିନ୍ନ ମହଲରେ ସ୍ୱାଗତ କରାଯାଇଥିଲା। ଇତିମଧ୍ୟରେ ତାଙ୍କର ଗସ୍ତକୁ ଏକ ସପ୍ତାହରୁ ଅଧିକ ସମୟ ବିତିଗଲା ପରେ ମଧ୍ୟ କିଛି ସୁଫଳ ମିଳି ପାରିନାହିଁ। ଏଣୁ ଜିଲ୍ଲାର ବରିଷ୍ଠ ଆଇନଜୀବୀ ତଥା ଜିଲ୍ଲା ବିଜେପି ର ପୂର୍ବତନ ସଭାପତି ବଳଦେବ ପ୍ରସାଦ ବେଦବାକ ଆଜି ତାଙ୍କର କାର୍ଯ୍ୟାଳୟ ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସରକାର ଙ୍କ ଏଭଳି ପାତର ଅନ୍ତର ନୀତି କୁ ଖୁବ ସମାଲୋଚନା କରି ସରକାରଙ୍କ ଉପରକୁ ବର୍ଷିଛନ୍ତି। ମିଳିଥିବା ତଥ୍ୟ ଅନୁସାରେ ସମଗ୍ର ସୁବର୍ଣ୍ଣପୁର ଜିଲ୍ଲାକୁ ମାତ୍ର ୮.୪୧ ଲକ୍ଷ ଟଙ୍କା ଆସିଥିବା ଜଣାପଡିଛି, ଯାହାକି ସୁବର୍ଣ୍ଣପୁର ଜିଲ୍ଲାର ଉନ୍ନତି ରେ ସମୁଦ୍ରକୁ ଶଙ୍ଖେ ପାଣି ସଦୃଶ। ପାଣ୍ଡିଆନ ଙ୍କ ଗସ୍ତ ରେ ୩କୋଟି ଖର୍ଚ୍ଚ କରି ଜିଲ୍ଲା ଉନ୍ନୟନ ପାଇଁ ୮.୪୧ ଲକ୍ଷ ଅନୁଦାନ ଜିଲ୍ଲା ବାସୀଙ୍କ ପ୍ରତି କ୍ରୁର ଉପହାସ ସଦୃଶ ଅଟେ ବୋଲି ବିଭିନ୍ନ ମହଲରେ ମଧ୍ୟ ପ୍ରତିକ୍ରିୟା ପ୍ରକାଶ ପାଇଛି।

ରିପୋର୍ଟ, ଉଗ୍ରସେନ କର୍ମୀ, ସୁବର୍ଣ୍ଣପୁର
ସଂପାଦକ,ଅଶ୍ୱିନୀ କୁମାର ନନ୍ଦ